పాన్ ఇండియా స్టార్ ప్రభాస్ కథానాయకుడిగా, దర్శకుడు హను రాఘవపూడి తెరకెక్కిస్తున్న 'ఫౌజీ' (వర్కింగ్ టైటిల్)పై అభిమానుల్లో భారీ అంచనాలు నెలకొన్నాయి. పీరియాడిక్ యాక్షన్-డ్రామాగా రూపొందుతున్న ఈ చిత్రంలో ప్రభాస్ ఇప్పటివరకు చేయని విభిన్నమైన పాత్రలో కనిపించనున్నట్లు ప్రచారం జరుగుతోంది. భావోద్వేగాలకు ప్రాధాన్యం ఇస్తూనే భారీ యాక్షన్ అంశాలను మేళవిస్తూ హను రాఘవపూడి తన ప్రత్యేక శైలిలో ఈ చిత్రాన్ని రూపొందిస్తున్నట్లు సినీ వర్గాలు చెబుతున్నాయి.
ఇటీవల విదేశీ విరామం కోసం ఇటలీ వెళ్లిన ప్రభాస్, విశ్రాంతి అనంతరం హైదరాబాద్‌కు తిరిగి వచ్చినట్లు సమాచారం. ఇప్పుడు సినిమా చివరి షెడ్యూల్ కోసం సిద్ధమవుతున్నారని టాక్ వినిపిస్తోంది. ఈ షెడ్యూల్‌లో కీలక యాక్షన్ సన్నివేశాలతో పాటు కథలో అత్యంత ముఖ్యమైన భాగాలను చిత్రీకరించనున్నట్లు తెలుస్తోంది. చిత్రీకరణను నిరాటంకంగా పూర్తి చేయడానికి ప్రభాస్ తన తేదీలను ప్రత్యేకంగా కేటాయించినట్లు సమాచారం.
సుమారు 60 రోజుల పాటు కొనసాగే ఈ ఫైనల్ షెడ్యూల్తో చిత్రీకరణ దాదాపు పూర్తయ్యే అవకాశాలు ఉన్నాయని సినీ వర్గాలు భావిస్తున్నాయి. అనంతరం పోస్ట్ ప్రొడక్షన్ పనులను వేగవంతం చేసి ప్రేక్షకులకు అత్యుత్తమ విజువల్ అనుభూతిని అందించేలా మేకర్స్ ప్రణాళికలు సిద్ధం చేస్తున్నట్లు తెలుస్తోంది. అయితే ఈ షెడ్యూల్‌కు సంబంధించిన పూర్తి వివరాలను చిత్రబృందం అధికారికంగా ప్రకటించాల్సి ఉంది.
