విజయ్ దేవరకొండ, రష్మిక మందన్న జంటగా నటించిన మోస్ట్ అవైటెడ్ పీరియాడిక్ యాక్షన్ డ్రామా ‘రనబలి’ ప్రమోషన్స్ ప్రస్తుతం జోరుగా సాగుతున్నాయి. రాహుల్ సాంకృత్యాన్ దర్శకత్వంలో తెరకెక్కిన ఈ సినిమా షూటింగ్ పూర్తిచేసుకుని, అక్టోబర్ 16, 2026న ప్రపంచవ్యాప్తంగా థియేటర్లలో విడుదలకు సిద్ధమవుతోంది. రిలీజ్‌కు సమయం దగ్గరపడటంతో మేకర్స్ వరుసగా ప్రమోషనల్ కంటెంట్‌ను ప్రేక్షకుల ముందుకు తీసుకొస్తున్నారు.
ఈ సినిమాపై ఆసక్తిని పెంచుతున్న మరో అంశం పెళ్లి తర్వాత విజయ్ దేవరకొండ, రష్మిక మందన్న కలిసి నటిస్తున్న తొలి చిత్రం కావడం. గతంలో గీత గోవిందం, డియర్ కామ్రేడ్ సినిమాల్లో జంటగా కనిపించిన వీరిద్దరూ.. ఈసారి పీరియాడిక్ నేపథ్యంలోని భిన్నమైన పాత్రల్లో కనిపించనున్నారు. విజయ్ రనబలిగా, రష్మిక జయమ్మగా నటిస్తున్నారు. వీరి పాత్రల మధ్య ఉండే అనుబంధం కథలో ముఖ్యమైన భాగంగా ఉండనుంది.
ఇప్పటికే “ఎందయ్యా సామి” పాట విడుదలతో సినిమాకు సంబంధించిన ప్రమోషనల్ హైప్ మరింత పెరిగింది. ప్రేమ, ఎమోషన్‌తో పాటు భారీ యాక్షన్ అంశాలతో రూపొందుతున్న ఈ సినిమాను మైత్రీ మూవీ మేకర్స్ నిర్మిస్తున్నారు. దసరా సీజన్‌లో అక్టోబర్ 16న ప్రేక్షకుల ముందుకు రానున్న ‘రనబలి’ కోసం విజయ్–రష్మిక అభిమానులు ఆసక్తిగా ఎదురుచూస్తున్నారు.
