తమిళ సినీ పరిశ్రమలో స్టార్ హీరోలుగా ప్రత్యేక గుర్తింపు తెచ్చుకున్న అజిత్ కుమార్, విజయ్.. లండన్‌లోని సిల్వర్‌స్టోన్ సర్క్యూట్‌లో ప్రత్యేకంగా కలుసుకున్నారు. మిషెలిన్ లే మాన్స్ కప్ రేసులో అజిత్ పాల్గొనగా.. ఈ ఈవెంట్‌కు హాజరైన విజయ్ స్వయంగా అజిత్‌ను కలిసి అభినందించారు. ఇద్దరి ఆత్మీయ కలయిక అభిమానుల దృష్టిని ఆకర్షించింది.
రేస్ అనంతరం ఇద్దరూ ఒకరికొకరు ప్రత్యేక బహుమతులు ఇచ్చుకున్నారు. విజయ్.. అజిత్‌కు మినియేచర్ రేస్ కారును బహుమతిగా అందించగా, అజిత్ సంతకం చేసిన హెల్మెట్‌ను విజయ్‌కు అందించినట్లు తాజా నివేదికలు వెల్లడించాయి. ఈ గిఫ్ట్ ఎక్స్చేంజ్ ఇద్దరి మధ్య ఉన్న పరస్పర గౌరవాన్ని మరోసారి చూపించింది.
సిల్వర్‌స్టోన్‌లో అజిత్–విజయ్ కలిసి ఉన్న ఫొటోలు, వీడియోలు సోషల్ మీడియాలో వైరల్‌గా మారుతున్నాయి. అభిమాన వర్గాల మధ్య ఎన్నో ఏళ్లుగా కనిపించిన పోటీకి భిన్నంగా.. ఇద్దరు స్టార్ హీరోలు ఆత్మీయంగా కలుసుకోవడం తమిళ సినీ అభిమానులకు ప్రత్యేకమైన క్షణంగా నిలిచింది.
