విరాట్ కర్ణ హీరోగా, అభిషేక్ నామా దర్శకత్వంలో తెరకెక్కుతున్న పాన్ ఇండియా మైథలాజికల్ అడ్వెంచర్ చిత్రం 'నాగబంధం' విడుదలకు ముందే భారీ చర్చకు దారితీస్తోంది. టీజర్, ట్రైలర్, పాటలు మరియు చిత్ర నిర్మాణ విలువలు చూసిన తర్వాత ఈ సినిమా బడ్జెట్పై సోషల్ మీడియాలో పెద్ద ఎత్తున చర్చ జరుగుతోంది. ముఖ్యంగా 'నాగబంధం' కోసం నిజంగానే రూ.100 కోట్లకు పైగా ఖర్చు చేశారా? అనే ప్రశ్న ఇప్పుడు సినీ వర్గాల్లో హాట్ టాపిక్గా మారింది.
మొదట్లో సాధారణ స్థాయిలో ప్రారంభమైన ఈ ప్రాజెక్ట్, కథ డిమాండ్కు అనుగుణంగా క్రమంగా భారీ స్థాయికి చేరిందని చిత్ర నిర్మాత నిషిత నాగిరెడ్డి ఇటీవల వెల్లడించారు. సినిమా నిర్మాణ సమయంలో కథకు తగ్గట్టుగా కొత్త ప్రపంచాలను సృష్టించాల్సి రావడంతో ప్రారంభ అంచనాల కంటే బడ్జెట్ నాలుగు నుంచి ఐదు రెట్లు పెరిగిందని ఆమె పేర్కొన్నారు.
ఈ చిత్రం కోసం ఇప్పటికే అనేక భారీ సెట్లు నిర్మించారు. వాటిలో ఒక దశావతారాల నేపథ్య సెట్కే సుమారు రూ.4.5 కోట్లు ఖర్చు చేసినట్లు దర్శకుడు అభిషేక్ నామా వెల్లడించారు. ఇది మాత్రమే కాకుండా కథలోని పలు కీలక ఘట్టాల కోసం మరిన్ని భారీ సెట్లు నిర్మించినట్లు సమాచారం.
అంతేకాదు, 'నాగబంధం' క్లైమాక్స్ ఎపిసోడ్పై కూడా నిర్మాతలు భారీగా పెట్టుబడి పెట్టారు. ట్రేడ్ వర్గాల సమాచారం ప్రకారం క్లైమాక్స్ సన్నివేశాలకే దాదాపు రూ.20 కోట్లు ఖర్చు చేసినట్లు ప్రచారం జరుగుతోంది. ఈ స్థాయి వ్యయం సాధారణంగా స్టార్ హీరోల భారీ చిత్రాల్లో మాత్రమే కనిపిస్తుంది.
ఇటీవల విదేశీ పంపిణీ సంస్థ విడుదల చేసిన ప్రచార సమాచారంలో 'నాగబంధం'ను రూ.100 కోట్ల బడ్జెట్తో రూపొందించిన విజువల్ స్పెక్టకల్గా పేర్కొన్నారు. దీంతో ఈ సినిమా బడ్జెట్ రూ.100 కోట్ల మార్క్ను దాటినట్లు వార్తలు మరింత బలపడ్డాయి.
అయితే చిత్ర యూనిట్ ఇప్పటివరకు అధికారికంగా తుది బడ్జెట్ను ప్రకటించలేదు. కానీ భారీ సెట్లు, అధునాతన విజువల్ ఎఫెక్ట్స్, అంతర్జాతీయ స్థాయి యాక్షన్ సీక్వెన్స్లు, బహుభాషా విడుదల ప్రణాళికలను పరిశీలిస్తే ఈ సినిమా నిజంగానే రూ.100 కోట్లకు సమీపంలో లేదా అంతకంటే ఎక్కువ వ్యయంతో రూపొందిందనే అభిప్రాయం ట్రేడ్ వర్గాల్లో వ్యక్తమవుతోంది.
జూలై 3న ప్రపంచవ్యాప్తంగా విడుదల కానున్న ఈ చిత్రం బాక్సాఫీస్ వద్ద ఎలాంటి ఫలితాన్ని అందుకుంటుందనేది ఇప్పుడు ఆసక్తికరంగా మారింది. బడ్జెట్ ఎంతైనా సరే, ప్రేక్షకులను ఆకట్టుకునే కంటెంట్ ఉంటేనే 'నాగబంధం' వంటి భారీ చిత్రాలు విజయాన్ని అందుకుంటాయని సినీ విశ్లేషకులు అభిప్రాయపడుతున్నారు.
