చిన్న బడ్జెట్‌తో తెరకెక్కిన ‘హనుమాన్ అంష్’ ఊహించని స్థాయిలో బాక్సాఫీస్ విజయాన్ని అందుకుంటోంది. నీమ్ కరోలి బాబా జీవితం, బోధనల ఆధారంగా రూపొందిన ఈ భక్తిరస ప్రధాన చిత్రం.. మౌత్ టాక్‌తో క్రమంగా పుంజుకుని ప్రపంచవ్యాప్తంగా రూ.250 కోట్ల మార్క్‌ను దాటింది. ఇదే జోరు కొనసాగితే త్వరలోనే రూ.300 కోట్ల క్లబ్‌లోకి అడుగుపెట్టే అవకాశాలు కనిపిస్తున్నాయి.
హిందీ ప్రేక్షకులను ఆకట్టుకున్న ఈ చిత్రం ఇప్పుడు తెలుగు ప్రేక్షకుల ముందుకు రాబోతోంది. సెప్టెంబర్ 18న ఆంధ్రప్రదేశ్, తెలంగాణలో ‘హనుమాన్ అంష్’ విడుదల కానుంది. తెలుగు వెర్షన్‌ను దర్శకుడు త్రివిక్రమ్ శ్రీనివాస్ ప్రెజెంట్ చేయనుండటంతో ఈ సినిమాపై టాలీవుడ్‌లోనూ ఆసక్తి పెరుగుతోంది. ఇప్పటికే బాక్సాఫీస్ వద్ద సాధించిన సంచలన విజయం తెలుగు రిలీజ్‌పై అంచనాలను పెంచుతోంది.
ఇదిలా ఉంటే.. ‘హనుమాన్ అంష్’ దర్శకుడు విశాల్ చతుర్వేది తన తదుపరి సినిమాను కూడా ప్రకటించారు. ‘రాంబోలా’ పేరుతో తెరకెక్కనున్న ఈ చిత్రం మహాకవి, భక్తకవి గోస్వామి తులసీదాస్ జీవితం, ఆధ్యాత్మిక ప్రయాణం చుట్టూ సాగనుంది. ఈ సినిమాకు కథ, దర్శకత్వ బాధ్యతలను విశాల్ చతుర్వేదే నిర్వహించనున్నారు. ‘హనుమాన్ అంష్’ విజయంతో ఈ కొత్త ప్రాజెక్ట్‌పై కూడా ఆసక్తి నెలకొంది.
