‘మహాశక్తి’ భక్తి, భావోద్వేగం, ఆధ్యాత్మిక అంశాలతో తెరకెక్కుతున్న ఆసక్తికరమైన చిత్రం. తన బిడ్డను కాపాడుకోవాలని తపించే ఓ తల్లి.. అమ్మవారిని సంపూర్ణ భక్తితో వేడుకుంటుంది. పరిస్థితులు చేయిదాటడంతో చివరకు తన ప్రాణాలనే అమ్మవారికి సమర్పించుకోవాలని నిర్ణయించుకుంటుంది. ఈ తల్లి త్యాగం తర్వాత ఏం జరిగింది? అనేదే కథలో కీలక అంశంగా మారనుంది.
ఈ చిత్రానికి సుందర్ సి. దర్శకత్వం వహిస్తున్నారు. భక్తి, ఆధ్యాత్మికతతో పాటు మిస్టరీ, సూపర్‌నేచురల్ అంశాలను జోడిస్తూ కథను తెరకెక్కించినట్లు ప్రమోషనల్ కంటెంట్ ద్వారా తెలుస్తోంది. కథలోని ముఖ్యమైన విషయాలను ముందుగానే వెల్లడించకుండా మేకర్స్ ఆసక్తిని కొనసాగిస్తున్నారు. ఓ తల్లి భక్తి, ఆమె చేసిన త్యాగం, అమ్మవారి శక్తి చుట్టూ కథనం సాగనుంది.
ఈ సినిమాలో నయనతార, ఊర్వశి, దునియా విజయ్, యోగిబాబు తదితరులు కీలక పాత్రల్లో నటిస్తున్నారు. భక్తి ప్రధానాంశంగా ఉన్నప్పటికీ.. ఎమోషన్, మిస్టరీ, సూపర్‌నేచురల్ అంశాలు కూడా కథలో భాగం కావడంతో సినిమాపై ఆసక్తి పెరుగుతోంది. బిడ్డను కాపాడేందుకు తల్లి చేసిన ప్రాణత్యాగానికి మహాశక్తి ఎలా స్పందించింది? ఆమె బిడ్డకు ఏమైంది? అనే ప్రశ్నలకు సమాధానం తెరపై చూడాల్సిందే.
