విభిన్నమైన కథలు, నటనకు ప్రాధాన్యత ఉన్న పాత్రలను ఎంచుకుంటూ తనకంటూ ప్రత్యేక గుర్తింపు తెచ్చుకున్న హీరోయిన్ నివేదా థామస్ కొత్త ప్రాజెక్ట్‌తో ప్రేక్షకుల ముందుకు రాబోతున్నారు. నిన్ను కోరి, వకీల్ సాబ్, శాకిని డాకిని వంటి సినిమాలతో మెప్పించిన ఆమె.. 35 చిన్న కథ కాదు చిత్రంలోనూ తన నటనతో ప్రశంసలు అందుకున్నారు. ఇప్పుడు కొంత గ్యాప్ తర్వాత ‘శ్రీమతి’ అనే ఆసక్తికరమైన ప్రాజెక్ట్‌తో రాబోతున్నారు.
ZEE5 తెలుగు ఒరిజినల్‌గా ‘శ్రీమతి’ రూపొందుతోంది. స్కైలాబ్ ఫేమ్ విశ్వక్ ఖండేరావు ఈ చిత్రానికి దర్శకత్వం వహిస్తుండగా, ప్రైమ్ షో ఎంటర్‌టైన్‌మెంట్స్ బ్యానర్‌పై కె. నిరంజన్ రెడ్డి, చైతన్య రెడ్డి నిర్మిస్తున్నారు. విడుదలైన ఫస్ట్ లుక్‌లో నివేదా సాధారణ గృహిణి తరహా పాత్రలో కనిపించడం ఆసక్తిని పెంచుతోంది. ఇంటి వాతావరణం, కుటుంబ జీవితం చుట్టూ తిరిగే కథగా ఇది ఉండబోతుందనే సంకేతాలు కనిపిస్తున్నాయి.
నివేదా మరోసారి బలమైన, సహజమైన పాత్రను ఎంచుకోవడంతో ‘శ్రీమతి’పై ఆసక్తి పెరుగుతోంది. ముఖ్యంగా సాధారణ కుటుంబ జీవితంలోని భావోద్వేగాలను కథగా మలచే ప్రయత్నం కావడంతో ఈ ప్రాజెక్ట్ ప్రేక్షకులకు కనెక్ట్ అయ్యే అవకాశాలు ఉన్నాయి. సినిమాకు సంబంధించిన కథ, ఇతర నటీనటులు, స్ట్రీమింగ్ తేదీ వంటి వివరాలను మేకర్స్ త్వరలో వెల్లడించే అవకాశం ఉంది.
