జూనియర్ ఎన్టీఆర్, ప్రశాంత్ నీల్ కాంబినేషన్‌లో తెరకెక్కుతున్న భారీ యాక్షన్ మూవీ ‘డ్రాగన్’ షూటింగ్‌కు ప్రస్తుతం ఎన్టీఆర్ దూరంగా ఉన్నారు. షూటింగ్ సమయంలో భుజానికి గాయం కావడంతో ఆయనకు ఆర్థ్రోస్కోపిక్ సర్జరీ జరిగింది. అనంతరం వైద్యుల సూచనల మేరకు రిహాబిలిటేషన్ తీసుకుంటున్న ఎన్టీఆర్ ఇంకా పూర్తిస్థాయిలో షూటింగ్‌లోకి తిరిగి రాలేదు.
ఎన్టీఆర్ లేని సమయంలో ఆయన అవసరం లేని సన్నివేశాలను దర్శకుడు ప్రశాంత్ నీల్ చిత్రీకరిస్తున్నారు. షూటింగ్ షెడ్యూల్‌ను కూడా పరిస్థితులకు అనుగుణంగా మార్చినట్లు సమాచారం. తాజా అప్‌డేట్స్ ప్రకారం ఎన్టీఆర్ అక్టోబర్‌లో ‘డ్రాగన్’ సెట్స్‌పైకి తిరిగి వచ్చే అవకాశం ఉంది. సినిమాలో ఆయన పాత్రకు సంబంధించిన కీలక సన్నివేశాలు ఇంకా చిత్రీకరించాల్సి ఉండటంతో, ఆయన రీఎంట్రీ తర్వాత షూటింగ్ మరింత వేగం పుంజుకునే అవకాశం ఉంది.
‘డ్రాగన్’లో రుక్మిణి వసంత్ కథానాయికగా నటిస్తుండగా, అనిల్ కపూర్ కీలక పాత్రలో కనిపించనున్నారు. ఈ సినిమాలో ఎన్టీఆర్ ‘లూగర్’ అనే పాత్రలో కనిపించనున్నట్లు ఇప్పటికే సమాచారం ఉంది. ప్రస్తుతం ఈ చిత్రం 2027 జూన్‌లో థియేటర్లలోకి రావాలని ప్లాన్ చేస్తున్నారు. ఇప్పుడు అభిమానుల దృష్టి ఎన్టీఆర్ రీఎంట్రీ, తదుపరి షూటింగ్ షెడ్యూల్‌పైనే ఉంది.
