న్యూఢిల్లీలో జరుగుతున్న 2026 BWF ప్రపంచ బ్యాడ్మింటన్ ఛాంపియన్‌షిప్స్లో భారత స్టార్ షట్లర్ పీవీ సింధు మరో కీలక పోరుకు సిద్ధమైంది. కెనడాకు చెందిన వెన్ యూ జాంగ్‌పై 21-16, 21-17తో విజయం సాధించిన సింధు ప్రీ-క్వార్టర్‌ఫైనల్‌కు చేరుకుంది. రెండు గేముల్లోనూ ప్రత్యర్థి నుంచి ఒత్తిడి ఎదురైనప్పటికీ అనుభవంతో మ్యాచ్‌ను తన వైపు తిప్పుకుంది.
ఇప్పుడు సింధు క్వార్టర్‌ఫైనల్ బెర్త్ కోసం చైనా స్టార్ వాంగ్ జి యీతో తలపడనుంది. ఈ మ్యాచ్ సింధుకు మరింత కఠిన పరీక్షగా మారనుంది. స్వదేశంలో జరుగుతున్న ప్రపంచ ఛాంపియన్‌షిప్‌లో చరిత్రాత్మక ఆరో ప్రపంచ పతకంపై కన్నేసిన సింధు, ప్రతి మ్యాచ్‌ను కీలకంగా తీసుకుంటోంది.
సింధుతో పాటు యువ భారత షట్లర్ ఆయుష్ శెట్టి కూడా ప్రీ-క్వార్టర్‌ఫైనల్‌కు చేరి భారత ఆశలను కొనసాగిస్తున్నాడు. మరోవైపు లక్ష్యసేన్, ఉన్నతి హుడా రెండో రౌండ్‌లోనే నిష్క్రమించడంతో భారత బృందానికి మిశ్రమ ఫలితాలు ఎదురయ్యాయి. ఢిల్లీలో ఆగస్టు 17 నుంచి 23 వరకు జరుగుతున్న ఈ టోర్నీలో భారత షట్లర్లు స్వదేశీ ప్రేక్షకుల మద్దతుతో మరిన్ని విజయాలు సాధించాలని అభిమానులు ఆశిస్తున్నారు.
