యశ్ నటించిన భారీ పాన్-ఇండియా చిత్రం ‘టాక్సిక్: ఎ ఫెయిరీ టేల్ ఫర్ గ్రోన్-అప్స్’ ఆగస్టు 26న ప్రపంచవ్యాప్తంగా థియేటర్లలోకి వచ్చింది. ఇదే సమయంలో సినిమాకు సంబంధించిన సెన్సార్ మార్పులు చర్చనీయాంశంగా మారాయి. కన్నడ ఒరిజినల్ వెర్షన్‌కు CBFC ‘A’ సర్టిఫికెట్ ఇస్తూ పలు సన్నివేశాలు, సంభాషణల్లో మార్పులు సూచించినట్లు తాజా నివేదికలు వెల్లడించాయి.
నివేదికల ప్రకారం, ఏడు చోట్ల శారీరక సాన్నిహిత్యానికి సంబంధించిన సన్నివేశాల నిడివిని సుమారు 30 శాతం తగ్గించగా, ఒక బెడ్‌రూమ్ సీక్వెన్స్‌ను దాదాపు 50 శాతం కుదించారు. కొన్ని హింసాత్మక సన్నివేశాల్లోనూ మార్పులు చేశారు. అభ్యంతరకరంగా భావించిన కొన్ని పదాలను మ్యూట్ చేయడం లేదా సబ్‌టైటిల్స్‌లో మార్చడం జరిగింది. మొత్తంగా సుమారు 33 సెకన్ల హింసాత్మక, లైంగిక కంటెంట్‌ను తొలగించినట్లు సమాచారం.
ఇక ప్రమోషనల్ ఈవెంట్‌లో యశ్ చేసిన వ్యాఖ్యలు కూడా అభిమానుల దృష్టిని ఆకర్షించాయి. సినిమాను అతిగా సీరియస్‌గా తీసుకోవద్దని, జీవితంలో ఏ రంగంలో ఎదగాలనుకున్నా కలలు కని వాటి కోసం కష్టపడాలని యువతకు సూచించారు. విజయం సాధించినా, విఫలమైనా దానికి బాధ్యత తీసుకోవాలని చెప్పిన యశ్.. సినిమా భాష, ప్రాంతాల సరిహద్దులను దాటి ప్రేక్షకులను కలిపే వేదికగా ఉండాలని పేర్కొన్నారు.
