వెస్టిండీస్‌తో జరగనున్న వన్డే, టీ20 సిరీస్‌ల కోసం టీమిండియా జట్ల ఎంపికపై నేడు కీలక సమావేశం జరగనుంది. అజిత్ అగార్కర్ నేతృత్వంలోని సెలక్షన్ కమిటీ న్యూఢిల్లీలో సమావేశమై రెండు ఫార్మాట్లకు సంబంధించిన ఆటగాళ్లను ఖరారు చేయనుంది. సెప్టెంబర్ 27 నుంచి మూడు వన్డేల సిరీస్ ప్రారంభం కానుండగా.. అనంతరం ఐదు టీ20లు జరగనున్నాయి. అదే సమయంలో ఆసియా క్రీడల కారణంగా పలువురు రెగ్యులర్ ఆటగాళ్లు అందుబాటులో లేకపోవడం ఎంపిక ప్రక్రియను ఆసక్తికరంగా మార్చింది.
ఈ నేపథ్యంలో సీనియర్ ఆల్‌రౌండర్ రవీంద్ర జడేజా వన్డే జట్టులోకి తిరిగి వచ్చే అవకాశంపై చర్చ జరుగుతోంది. ఆసియా క్రీడల కోసం అక్షర్ పటేల్ వంటి ఆటగాళ్లు అందుబాటులో లేకపోవడంతో స్పిన్ ఆల్‌రౌండర్ విభాగంలో జడేజా అనుభవం ఉపయోగపడే అవకాశం ఉందని నివేదికలు పేర్కొంటున్నాయి. మరోవైపు రిషభ్ పంత్‌ను వైట్‌బాల్ జట్టులోకి తిరిగి తీసుకునే అంశం కూడా సెలెక్టర్ల పరిశీలనలో ఉన్నట్లు తెలుస్తోంది.
ఇక హార్దిక్ పాండ్యా ఫిట్‌నెస్ కూడా సెలక్షన్ మీటింగ్‌లో కీలక అంశంగా మారనుంది. ముఖ్యంగా వన్డేల్లో పూర్తి స్థాయిలో బౌలింగ్ చేయడంతో పాటు 50 ఓవర్లు ఫీల్డింగ్ చేయగల సామర్థ్యాన్ని సెలెక్టర్లు పరిగణనలోకి తీసుకోనున్నారు. ఆసియా క్రీడల అవసరాలు, వెస్టిండీస్ సిరీస్ అవసరాలను సమన్వయం చేస్తూ సెలెక్టర్లు ఎలాంటి జట్లను ఎంపిక చేస్తారన్నది ఇప్పుడు ఆసక్తికరంగా మారింది.
