కేరళలోని మావేలిక్కర ప్రాంతానికి చెందిన 19 ఏళ్ల కెజియా లిజ్ మెజో మిస్ యూనివర్స్ ఇండియా 2026 కిరీటాన్ని సొంతం చేసుకున్నారు. జైపూర్‌లో జరిగిన గ్రాండ్ ఫినాలేలో 52 మంది పోటీదారులను దాటి ఆమె విజేతగా నిలిచారు. ఈ విజయంతో మిస్ యూనివర్స్ ఇండియా టైటిల్ గెలిచిన తొలి కేరళకు చెందిన మహిళగా కెజియా గుర్తింపు పొందారు.
చిన్న వయసులోనే కెజియా పేజెంట్ ప్రపంచంలో తనదైన ప్రయాణాన్ని ప్రారంభించారు. 2024లో మిస్ టీన్ దివా టైటిల్ గెలుచుకున్న ఆమె, 2025లో మిస్ టీన్ ఇంటర్నేషనల్ పోటీల్లో భారత్ తరఫున పాల్గొని ఫస్ట్ రన్నరప్‌గా నిలిచారు. ప్రస్తుతం న్యాయశాస్త్రం చదువుతున్న ఆమె మోడలింగ్‌తో పాటు క్లాసికల్ డ్యాన్స్, సంగీతం వంటి రంగాల్లోనూ శిక్షణ పొందారు. ఆమె బాల్యంలో ఎక్కువ కాలం అబుదాబిలో గడిపారు.
జాతీయ కిరీటం దక్కించుకున్న కెజియాకు ఇప్పుడు అంతర్జాతీయ వేదికపై మరో కీలక బాధ్యత ఎదురుకానుంది. నవంబర్‌లో ప్యూర్టో రికోలో జరగనున్న 75వ మిస్ యూనివర్స్ పోటీలో ఆమె భారత్‌కు ప్రాతినిధ్యం వహించనున్నారు. ఇప్పటికే పేజెంట్ అనుభవం ఉన్న కెజియా, ఈసారి ప్రపంచ వేదికపై భారతదేశానికి మరో విశ్వసుందరి కిరీటం తీసుకురావాలనే లక్ష్యంతో సిద్ధమవుతున్నారు.
