రోహిత్ శర్మ, విరాట్ కోహ్లీ 2027 వన్డే వరల్డ్ కప్‌లో ఆడతారా? అనే ప్రశ్నకు ఇప్పటికీ స్పష్టమైన సమాధానం లేదు. ఇద్దరు సీనియర్ స్టార్ క్రికెటర్ల భవిష్యత్‌పై చర్చ మొదలైనప్పటికీ.. మాజీ టీమిండియా పేసర్ ఆశిష్ నెహ్రా మాత్రం ఇప్పుడే ఒక నిర్ణయానికి రావడం తొందరపాటు అవుతుందని అభిప్రాయపడ్డారు.
రాబోయే రోజుల్లో ఆటగాళ్ల ఫామ్, ఫిట్‌నెస్, ప్రదర్శనల ఆధారంగా పరిస్థితులు పూర్తిగా మారే అవకాశం ఉందని నెహ్రా సూచించారు. అందుకే రోహిత్, విరాట్‌ను ఇప్పుడే వరల్డ్ కప్ లెక్కల నుంచి తీసేయాల్సిన అవసరం లేదన్నట్టుగా ఆయన వ్యాఖ్యలు ఉన్నాయి. వారి అనుభవంతో పాటు భవిష్యత్‌లో చూపించే ఆట కూడా సెలెక్షన్‌లో కీలకంగా మారనుంది.
ఒకవైపు యువ ఆటగాళ్లతో టీమిండియా కొత్త బృందాన్ని సిద్ధం చేస్తూనే.. మరోవైపు రోహిత్, విరాట్ వంటి సీనియర్ల అనుభవాన్ని కూడా జట్టు ఉపయోగించుకోవచ్చు. 2027 వరల్డ్ కప్‌కు ఇంకా సమయం ఉండటంతో.. అప్పటివరకు వీరిద్దరి ఫామ్ ఎలా ఉంటుంది, సెలెక్టర్లు ఎలాంటి నిర్ణయం తీసుకుంటారు అన్నదే ఇప్పుడు ఆసక్తికరంగా మారింది.
