భారత పురుషుల సీనియర్ క్రికెట్ జట్టుకు స్పిన్ బౌలింగ్ కోచ్‌గా మాజీ క్రికెటర్ సైరాజ్ బహుతులేను బీసీసీఐ నియమించింది. జూన్ 2, 2026న ఈ నియామకాన్ని అధికారికంగా ప్రకటించింది. దీంతో టీమ్ ఇండియా కోచింగ్ సెటప్‌లో ప్రత్యేక స్పిన్ బౌలింగ్ నిపుణుడు చేరినట్లైంది. ఆటగాడిగా, కోచ్‌గా బహుతులేకు ఉన్న అనుభవం ఈ బాధ్యతలో కీలకంగా ఉండనుంది.
బహుతులే భారత్ తరఫున రెండు టెస్టులు, ఎనిమిది వన్డేలు ఆడారు. దేశవాళీ క్రికెట్‌లో దాదాపు రెండు దశాబ్దాల కెరీర్‌లో 6,176 ఫస్ట్‌క్లాస్ పరుగులు, 630 వికెట్లు సాధించారు. ఆటకు వీడ్కోలు పలికిన తర్వాత విదర్భ, కేరళ, గుజరాత్, బెంగాల్ జట్లకు హెడ్ కోచ్‌గా పనిచేయడంతో పాటు రాజస్థాన్ రాయల్స్, పంజాబ్ కింగ్స్ వంటి ఐపీఎల్ జట్లలో స్పిన్ బౌలింగ్ కోచ్‌గా కూడా సేవలందించారు.
భారత ఆటగాళ్ల అభివృద్ధి కార్యక్రమాల్లోనూ బహుతులేకు మంచి అనుభవం ఉంది. 2022 అండర్-19 ప్రపంచకప్ విజేత భారత జట్టుకు బౌలింగ్ కోచ్‌గా పనిచేసిన ఆయన, 2024 అండర్-19 ప్రపంచకప్ కోచింగ్ స్టాఫ్‌లోనూ ఉన్నారు. ఇప్పుడు సీనియర్ టీమ్ స్పిన్ కోచ్‌గా బాధ్యతలు స్వీకరించిన బహుతులే.. అన్ని ఫార్మాట్లలో ఆటగాళ్లతో కలిసి పనిచేయడానికి సిద్ధంగా ఉన్నట్లు తెలిపారు.
