భారత స్టార్ బ్యాడ్మింటన్ జోడీ సాత్విక్‌సాయిరాజ్ రంకిరెడ్డి, చిరాగ్ శెట్టి చైనా మాస్టర్స్ సూపర్ 750 టైటిల్‌ను తొలిసారి గెలిచి చరిత్ర సృష్టించింది. ఫైనల్లో చైనా జోడీ హీ జీ టింగ్, రెన్ షియాంగ్ యూను ఓడించిన భారత జంట.. తొలి గేమ్‌ను 11-21తో కోల్పోయినప్పటికీ అద్భుతమైన పునరాగమనం చేసింది.
రెండో గేమ్‌లో సాత్విక్-చిరాగ్ 21-13తో విజయం సాధించి మ్యాచ్‌ను సమం చేశారు. నిర్ణయాత్మక మూడో గేమ్‌లోనూ ఒత్తిడిని అధిగమిస్తూ 21-17తో గెలిచి టైటిల్‌ను సొంతం చేసుకున్నారు. గతంలో 2023, 2025 ఎడిషన్లలో రన్నరప్‌గా నిలిచిన ఈ జోడీ.. మూడోసారి ఫైనల్లో మాత్రం ఎలాంటి పొరపాటుకు తావివ్వకుండా టైటిల్ సాధించింది.
ఈ విజయం సాత్విక్-చిరాగ్‌కు టైటిల్ మాత్రమే కాకుండా రాబోయే ఆసియా క్రీడలకు మంచి బూస్ట్‌ను అందించింది. హాంగ్‌జౌలో సాధించిన పురుషుల డబుల్స్ స్వర్ణాన్ని కాపాడుకోవాలనే లక్ష్యంతో ఉన్న ఈ జంటకు చైనా మాస్టర్స్ విజయం మరింత ఆత్మవిశ్వాసాన్ని ఇచ్చింది. ప్రపంచ బ్యాడ్మింటన్‌లో భారత జోడీగా తమ ఆధిపత్యాన్ని మరోసారి చాటుకున్నారు.
