2026 బీడబ్ల్యూఎఫ్ ప్రపంచ బ్యాడ్మింటన్ ఛాంపియన్‌షిప్‌లో పీవీ సింధు ప్రయాణం ప్రీ-క్వార్టర్‌ఫైనల్లోనే ముగిసింది. న్యూఢిల్లీలోని ఇందిరాగాంధీ ఇండోర్ స్టేడియంలో గురువారం జరిగిన ఉత్కంఠభరిత పోరులో చైనాకు చెందిన వరల్డ్ నంబర్ 3 వాంగ్ జీ యీ చేతిలో సింధు 11–21, 21–15, 17–21తో పరాజయం పాలైంది. స్వదేశీ ప్రేక్షకుల మద్దతుతో బరిలోకి దిగిన సింధు చివరి వరకు పోరాడినా విజయం మాత్రం అందుకోలేకపోయింది.
తొలి గేమ్‌లో వాంగ్ జీ యీ తన వేగం, నియంత్రిత ఆటతో ఆధిపత్యం ప్రదర్శించగా.. సింధు ఆశించిన స్థాయిలో పుంజుకోలేకపోయింది. అయితే రెండో గేమ్‌లో భారత స్టార్ తన ఆటతీరును పూర్తిగా మార్చుకుంది. ర్యాలీలను పొడిగిస్తూ, ప్రత్యర్థిపై ఒత్తిడి పెంచిన సింధు 21–15తో ఆ గేమ్‌ను గెలిచి మ్యాచ్‌ను సమం చేసింది. దీంతో నిర్ణాయక గేమ్‌పై ఉత్కంఠ మరింత పెరిగింది.
మూడో గేమ్‌లో సింధు ఆరంభంలో ఆధిక్యంలోకి వెళ్లి విజయంపై ఆశలు రేకెత్తించింది. కానీ కీలక దశలో వాంగ్ జీ యీ తిరిగి పుంజుకుని స్కోరును సమం చేస్తూ చివర్లో పైచేయి సాధించింది. దీంతో సింధు ఆరో ప్రపంచ ఛాంపియన్‌షిప్ పతకం సాధించాలన్న లక్ష్యం ముగిసింది. ఓటమి ఎదురైనా, సొంత గడ్డపై చివరి వరకు పోరాడిన సింధు ప్రదర్శన అభిమానులను ఆకట్టుకుంది.
