సైబర్ నేరాలు, ఆన్‌లైన్ ఆర్థిక మోసాలను అడ్డుకునే చర్యల్లో భాగంగా కేంద్ర ప్రభుత్వం 3,718 మొబైల్ యాప్‌లను బ్లాక్ చేసింది. వీటిలో మోసపూరిత లోన్ యాప్‌లు కూడా ఉన్నట్లు కేంద్ర హోంశాఖ వెల్లడించింది. ఈ చర్యలను ఇండియన్ సైబర్ క్రైమ్ కోఆర్డినేషన్ సెంటర్ (I4C) ఆధ్వర్యంలో చేపట్టారు.
యాప్‌లపై చర్యలతో పాటు సైబర్ నేరాలకు సంబంధం ఉన్న 15.75 లక్షలకు పైగా సిమ్ కార్డులు, 5.77 లక్షల IMEI నంబర్లను కూడా బ్లాక్ చేసినట్లు ప్రభుత్వం తెలిపింది. అలాగే, సిటిజన్ ఫైనాన్షియల్ సైబర్ ఫ్రాడ్ రిపోర్టింగ్ అండ్ మేనేజ్‌మెంట్ సిస్టమ్ ద్వారా వచ్చిన 32.80 లక్షలకు పైగా ఫిర్యాదుల్లో ₹11,158 కోట్లకు పైగా నష్టాన్ని అడ్డుకున్నట్లు సమాచారం.
డిజిటల్ మోసాలు పెరుగుతున్న నేపథ్యంలో ప్రజలు అప్రమత్తంగా ఉండటం కీలకం. తెలియని వ్యక్తులు పంపే లింకులు, అనుమానాస్పద యాప్‌లు, అధిక రాబడులు లేదా తక్షణ రుణాల పేరుతో వచ్చే ఆఫర్లను పరిశీలించకుండా నమ్మకూడదు. యాప్‌లను అధికారిక యాప్ స్టోర్ల నుంచే డౌన్‌లోడ్ చేసుకోవడం, వ్యక్తిగత లేదా బ్యాంకింగ్ వివరాలను గుర్తుతెలియని వేదికల్లో నమోదు చేయకపోవడం ద్వారా మోసాల ప్రమాదాన్ని తగ్గించుకోవచ్చు.
